SEMPLICEMENTE FRANKO

Franko la me ricordi dove el xe nato e come iera la sua infanzia?

Mi son nato el 1°  novembre del ’48, subito dopo la guerra. Come son nato i me ga subito registrà come minoranza italiana. A quel tempo, i te dava un picio libreto. Pensa, mia mama la xe de discendenza argentina e de nazionalità italiana, Antonia Arhenti. Mio papà invese, Antonio Železnjak, gaveva discendenza rusa da parte de mama. Mi go anche un fradelastro più grande, de parte de mama. Povera la xe restada vedova sai giovine. El suo primo marì xe stado giustizià in tei boschi, perché el iera partigian.

Go sai bei ricordi dei noni, da parte de mama, perché vivevimo insieme. Se tegnivimo sai streti, perché alcuni dei fioi xe andai in Canada, a sercar una vita più bona de quela che gavevimo noi in quei tempi.

Fin quando la viveva a Bosamarin?

Iero ancora sai picio co se gavemo trasferì da Bosamarin a Capodistria. Gavevo tre ani e semo andai viver nela Via dei Agricoltori. Me piaseva sai viver in città. Specialmente le sere de estate, quando tuti i visini i vegniva fora intela via a rinfrescarse dal caldo. Iera sempre una bela festa. Tuti davanti a le porte.

Come iera i tempi de scola e a cosa ghe piaseva giogar come fioi?

Andavo a la scola elementare Pier Paolo Vergerio il Vecchio. Me piaseva andar a scola e la gavevo rente casa mia.  In cinque minuti iero là.

Coi compagni de scola se sai giogava e a mi me piaseva tanto el giogo dei ‘Ciclisti’. Ti ciolevi el tappo dela fiasca, quel dela bira o dela Radenska e ti tiravi fora el suro e ti lo cambiavi con un disegnin o una fotografia del giornal. Quel che ti trovavi ti taiavi ben a forma de sercio. E dopo ti lo involtizàvi tuto con la pelicola de cusina o plastica. Cussì nol se rovinava co ti lo tiravi nei ciclisti dei altri che i iera ben posizionadi in forma de triangolo. Tuti quei che ti li butavi fora del triangolo, ti li vinsevi. Mi a casa gavevo quatro sachi pieni de ciclisti, per come iero bravo. Oltre a questo giogavimo a ‘Ore in tel muro’, a ‘Soldi’, al ‘Pandolo’ e non mancava mai el balon. Il giogo ‘Toca vaso’ però iera pericoloso, perché se te ribaltavi el vaso co te butavi la piereta iera guai. Te sa come corevimo da la furia dele mame, none e visine de casa. Gavemo roto vasi de tute le forme e qualità.

E dopo che la gà finì la scola, el xe andà subito lavorar?

Dopo che go finì la scola elementar, volevo andar avanti per imparar el mestier de mecanico ma no iera più posto e son rimasto a casa per un ano. Ma mi bramavo de andar lavorar. Non vedevo l’ora e cussì a sedise ani go comincià a lavorar a la Cooperativa Agraria come mestierante macelaio, o garzon, come se diseva. Prima a Capodistria e dopo con la Jestvina a Scofie e a Ancaran. No go mai dimentica la bora a Scofie. No la xe più come la iera una volta, ogi no xe niente per quel che la sufia. Una sera, finido el lavor a Scofie iera un fredo boia e la sufiava de bruto. No so gnanca come son rivà fin ala fermada de la coriera. Me tegnivo forte sul pasaman. E co la go vista rivar, go comincia a pensar come fazo a salir co sta bora. La coriera se ga fermà con la porta proprio davanti de mi e no gavevo altro che lassar el pasaman. Cio’, in un secondo me go trova dentro intela coriera. Son tornà casa tuto un dolor.
Anche se far el macelaio per un mulo iera duro, non me ga mai dispiasù farlo. Come el militar in Bosnia, dove i mii xe rivai trovarme una sola volta, per come iera lontan. Go trovà sempre amici dove che andavo e gnanca la lingua non iera mai un ostacolo, se gavemo capì tuto coi moti.

E dopo el militar? E quando la se ga trasferi in Ancaran?

Tornà dal militar go continuà a lavorar come macelaio intela Jestvina e a Crevatini go conosudo la mia Nada. Se gavemo sposà nel ‘73 e gavemo cresudo i fioi: Ingrid e Mitja. Dopo go cambia anche el lavor. Son entrado intela Sicurezza de Capodistria.

Ancora ogi me ricordo la data de quando se gavemo trasferì in Ancaran. Iera el 13 otobre del ‘73.

Quanto go patì per ciapar el quartier. Poco prima che i ga finì i lavori sule palassine go incontrado Jože, el ingenier dei lavori,  che iera un vecio amico e ghe go subito dito che mi vegnivo a star quassù in una palassina. Son andado a Isola a far domanda e son torna casa tuto scoragià perché quasi tuti i quartieri iera za ocupai. Ma no go molà. Son ritornado dopo do mesi a rifar tute le carte e la  segretaria se ga sbaia a scriver el mio nome. La ga meso Stipe Železnjak. A co go ciapado ste carte a casa, son ritornado de ela tuto rabià e ghe go dito che la fazi tuto de novo. No go mai capì come la ga rivà scriver Stipe da la carta d’identita, che la gaveva a do centimentri da la richiesta.

Go pensà ’sta qua no la sa gnanca de ricopiar. Ma ancora non iera finide le sorprese, dopo i ga scambiado el quartier mio con uno de un altra familia. Ma ala fine me xe andada ben, basta che son rivado in Ancaran.

E coma iera la vita in sto tanto bramado Ancaran?

Iera bela e tranquila, qua se sta sai ben. Se conosemo tuti, xe tanta natura, el mar vizin. Crescer i fioi qua iera sicuro.

Nei ani non son mai sta fermo. Iero sempre ativo e me piasi anche ogi star coi giovani e iutarli. Con Vlado Jakomin gavemo verto el primo club de canotagio in Adria, aiutavo i muli ad alenarse col balon e ancora oggi me piasi dar una man ala sicurezza quando gavemo i nostri eventi ancaranesi. Nei ultimi inverni go cominciado a far dei lavoreti con el legno, e me ga piasudo cussì tanto, che me go impara anche a intaiar.  Me piasi costruir robe e cussì me pasa el tempo e son ativo con le man.

Per concluder, sior Franko, la ga qualche bon consiglio per i giovani de ogi?

Mi ghe consiglio de darse al divertimento e svago, magari con lo sport o anche con robe creative, ma de non farse trasportar dai vizi negativi.